ਅਖ਼ਬਾਰ 
Newspaper



ਵਾਕਫ਼ੀਅਤ ਦੀ ਭੁੱਖ ਅਥਵਾ ਗਿਆਨ ਪ੍ਰਾਪਤ ਕਰਨ ਦੀ ਇੱਛਾ ਮਨੁੱਖ ਦੀ ਮਹੱਤਵਪੂਰਨ ਰੁਚੀ ਹੈ। ਅਖ਼ਬਾਰਾਂ ਇਸ ਕੰਮ ਵਿੱਚ ਮਹੱਤਵਪੂਰਨ ਰੋਲ ਨਿਭਾਉਂਦੀਆਂ ਹਨ। ਸਵੇਰੇ ਉੱਠਦੇ ਸਾਰ ਹੀ ਹਰ ਵਿਅਕਤੀ ਅਖ਼ਬਾਰ ਦੇਖਣਾ ਚਾਹੁੰਦਾ ਹੈ ਅਤੇ ਜਾਣਨਾ ਚਾਹੁੰਦਾ ਹੈ ਕਿ ਬੀਤੇ ਦਿਨ ਵਿੱਚ ਦੁਨੀਆਂ ਵਿੱਚ ਕੀ ਵਿਸ਼ੇਸ਼ ਘਟਨਾਵਾਂ ਵਾਪਰੀਆਂ ਹਨ। ਅਖ਼ਬਾਰਾਂ ਵਿੱਚ ਜਿੱਥੇ ਵਿਸ਼ੇਸ਼ ਘਟਨਾਵਾਂ ਦੀਆਂ ਖ਼ਬਰਾਂ ਹੁੰਦੀਆਂ ਹਨ ਉੱਥੇ ਨਾਲ ਹੀ ਮੰਡੀਆਂ ਦੇ ਭਾਅ, ਮੌਸਮ ਦਾ ਹਾਲ, ਵਿਦਵਾਨਾਂ ਦੇ ਲੇਖ, ਚਲੰਤ ਮਸਲਿਆਂ ਬਾਰੇ ਚਰਚਾ ਅਤੇ ਜਨਤਾ ਦੀਆਂ ਸ਼ਿਕਾਇਤਾਂ ਵੀ ਛਾਪੀਆਂ ਜਾਂਦੀਆਂ ਹਨ। ਅਖ਼ਬਾਰਾਂ ਨਿਰੀਪੁਰੀ ਅਜਿਹੀ ਵਾਕਫ਼ੀਅਤ ਹੀ ਨਹੀਂ ਦਿੰਦੀਆਂ ਸਗੋਂ ਇਸ ਬਾਰੇ ਆਪਣੀ ਰਾਏ ਵੀ ਦਿੰਦੀਆਂ ਹਨ। ਆਮ ਲੋਕਾਂ ਕੋਲ ਦੇਸ ਦੀਆਂ ਸਮੱਸਿਆਵਾਂ ਬਾਰੇ ਸੋਚਣ ਦੀ ਫ਼ਰਸਤ ਅਤੇ ਸਮਰੱਥਾ ਨਹੀਂ ਹੁੰਦੀ। ਅਖ਼ਬਾਰਾਂ ਦੇ ਮੁੱਖ ਸੰਪਾਦਕ ਲੋਕਾਂ ਦੀ ਥਾਂ ਸੋਚ ਕੇ, ਦਲੀਲਾਂ ਰਾਹੀਂ ਸਾਨੂੰ ਸਮਝਾਉਂਦੇ ਹਨ ਕਿ ਕਿਸੇ ਮਸਲੇ ਸੰਬੰਧੀ ਸਾਡੀ ਠੀਕ ਰਾਏ ਅਤੇ ਠੀਕ ਵਤੀਰਾ ਕੀ ਹੋਣਾ ਚਾਹੀਦਾ ਹੈ ? ਅਖ਼ਬਾਰਾਂ ਇੱਕ ਵੱਡੀ ਤਾਕਤ ਹਨ ਪਰ ਅਜੋਕੇ ਯੁੱਗ ਵਿੱਚ ਕਈ ਸਸਤੇ ਅਤੇ ਪ੍ਰਚਾਰੀ ਅਖ਼ਬਾਰ ਵੀ ਪ੍ਰਚਲਿਤ ਹਨ। ਅਜਿਹੇ ਅਖ਼ਬਾਰ ਸੱਚ ਤੋਂ ਦੂਰ ਰਹਿ ਕੇ ਆਪਣੀ ਵਿਕਰੀ ਵਧਾਉਣ ਦੀ ਕੋਸ਼ਸ਼ ਕਰਦੇ ਹਨ। ਪਰ ਇਹ ਗ਼ਲਤ ਰੁਚੀ ਹੈ। ਅਖ਼ਬਾਰਾਂ ਦੇ ਸੰਪਾਦਕਾਂ ਨੂੰ ਦੇਸ਼ ਅਤੇ ਸਮਾਜ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਨੂੰ ਕਦੇ ਵੀ ਨਹੀਂ ਭੁੱਲਣਾ ਚਾਹੀਦਾ। ਅਖ਼ਬਾਰਾਂ ਨੂੰ ਜਨਤਾ ਅਤੇ ਸਰਕਾਰ ਨੂੰ ਵੀ ਆਪਣੀਆਂ ਜ਼ਿੰਮੇਵਾਰੀਆਂ ਨਿਭਾਉਣ ਦੀ ਪ੍ਰੇਰਨਾ ਦੇਣੀ ਚਾਹੀਦੀ ਹੈ। ਲੋੜ ਇਸ ਗੱਲ ਦੀ ਹੈ ਕਿ ਹੋਛੇਪਨ ਵਿੱਚ ਕਿਸੇ ਦੀ ਭੰਡੀ ਨੂੰ ਛੱਡ ਕੇ ਸੰਜਮ ਨਾਲ ਸੱਚ ਨੂੰ ਬਿਆਨ ਕੀਤਾ ਜਾਵੇ ਤਾਂ ਹੀ ਇਹ ਅਖ਼ਬਾਰ ਦੇਸ ਦੀ ਸੱਚੀ ਸੇਵਾ ਅਤੇ ਜਨਤਾ ਦੀ ਯੋਗ ਅਗਵਾਈ ਕਰ ਸਕਦੇ ਹਨ।