ਤਿਉਹਾਰ ਦਾ ਦਿਨ 
Tiyuhar Da Din



ਤਿਉਹਾਰਾਂ ਦਾ ਸਾਡੇ ਜੀਵਨ ਵਿੱਚ ਵਿਸ਼ੇਸ਼ ਮਹੱਤਵ ਹੈ। ਰੱਖੜੀ, ਦੁਸਹਿਰਾ, ਦਿਵਾਲੀ, ਲੋਹੜੀ, ਬਸੰਤ, ਹੋਲੀ, ਵਿਸਾਖੀ ਆਦਿ ਤਿਉਹਾਰ ਭਾਵੇਂ ਵਿਸ਼ੇਸ਼ ਪ੍ਰਸੰਗਾਂ ਨਾਲ ਜੁੜੇ ਹੋਏ ਹਨ ਪਰ ਅਸੀਂ ਇਹਨਾਂ ਨੂੰ ਖ਼ੁਸ਼ੀ ਅਤੇ ਉਤਸ਼ਾਹ ਨਾਲ ਮਨਾਉਂਦੇ ਹਾਂ। ਤਿਉਹਾਰ ਕੋਈ ਵੀ ਹੋਵੇ, ਸਾਡੇ ਜੀਵਨ ਨੂੰ ਖੁਸ਼ੀ ਪ੍ਰਦਾਨ ਕਰਦਾ ਹੈ। ਇਸੇ ਲਈ ਤਿਉਹਾਰ ਦੇ ਦਿਨ ਦੀ ਬੜੀ ਬੇਤਾਬੀ ਨਾਲ ਉਡੀਕ ਕੀਤੀ ਜਾਂਦੀ ਹੈ। ਵੱਡੇ ਤਿਉਹਾਰਾਂ ਨੂੰ ਮਨਾਉਣ ਲਈ ਤਾਂ ਪਹਿਲਾਂ ਤੋਂ ਹੀ ਤਿਆਰੀਆਂ ਕੀਤੀਆਂ ਜਾਂਦੀਆਂ ਹਨ ਅਤੇ ਘਰਾਂ ਦੀ ਸਫ਼ਾਈ ਵੀ ਕੀਤੀ ਜਾਂਦੀ ਹੈ। ਤਿਉਹਾਰ ਵਾਲੇ ਦਿਨ ਸਭ ਲੋਕਾਂ ਵਿੱਚ ਵਿਸ਼ੇਸ਼ ਉਤਸ਼ਾਹ ਹੁੰਦਾ ਹੈ। ਲੋਕ ਨਵੇਂ ਕੱਪੜੇ ਪਾਉਂਦੇ ਹਨ, ਮਠਿਆਈਆਂ ਖ਼ਰੀਦਦੇ ਤੇ ਵੰਡਦੇ ਹਨ ਅਤੇ ਇੱਕ ਦੂਸਰੇ ਨੂੰ ਮੁਬਾਰਕਬਾਦ ਦਿੰਦੇ ਹਨ। ਤਿਉਹਾਰ ਵਾਲੇ ਦਿਨ ਘਰਾਂ ਵਿੱਚ ਕਈ ਤਰਾਂ ਦੇ ਪਕਵਾਨ ਤਿਆਰ ਕੀਤੇ ਜਾਂਦੇ ਹਨ। ਇਸ ਦਿਨ ਸੱਭ ਪਾਸੇ ਖੁਸ਼ੀ ਟਪਕਦੀ ਦਿਖਾਈ ਦਿੰਦੀ ਹੈ। ਬਜ਼ਾਰਾਂ ਵਿੱਚ ਚਹਿਲ-ਪਹਿਲ ਹੁੰਦੀ ਹੈ। ਤਿਉਹਾਰ ਵਾਲੇ ਦਿਨ ਬੱਚਿਆਂ ਦੀ ਖੁਸ਼ੀ ਵੀ ਦੇਖਣ ਵਾਲੀ ਹੁੰਦੀ ਹੈ। ਉਹਨਾਂ ਨੂੰ ਤਿਉਹਾਰ ਦੇ ਦਿਨ ਦਾ ਚਾਅ ਚੜਿਆ ਹੁੰਦਾ ਹੈ।ਉਹ ਆਪਣੇ ਘਰਦਿਆਂ ਨਾਲ ਬਜ਼ਾਰ ਜਾ ਕੇ ਆਪਣੀ ਮਨ-ਪਸੰਦ ਦੀਆਂ ਚੀਜ਼ਾਂ ਖ਼ਰੀਦਦੇ ਹਨ। ਜੇਕਰ ਨੇੜੇ-ਤੇੜੇ ਕਿਤੇ ਮੇਲਾ ਲੱਗਾ ਹੋਵੇ ਤਾਂ ਉਹ ਉੱਥੇ ਜਾ ਕੇ ਮੇਲੇ ਦਾ ਵੀ ਅਨੰਦ ਮਾਣਦੇ ਹਨ। ਤਿਉਹਾਰ ਨਾਲ ਸੰਬੰਧਿਤ ਰਸਮ ਨੂੰ ਹਰ ਕੋਈ ਖੁਸ਼ੀ ਅਤੇ ਉਤਸ਼ਾਹ ਨਾਲ ਮਨਾਉਂਦਾ ਹੈ। ਤਿਉਹਾਰ ਦਾ ਦਿਨ ਸਾਡੇ ਲਈ ਸੱਚ-ਮੁੱਚ ਹੀ ਖ਼ੁਸ਼ੀਆਂ ਦਾ ਦਿਨ ਹੁੰਦਾ ਹੈ। ਹਰ ਕੋਈ ਚਾਹੁੰਦਾ ਹੈ ਕਿ ਉਸ ਦੇ ਜੀਵਨ ਵਿੱਚ ਖ਼ੁਸ਼ੀਆਂ ਭਰੇ ਅਜਿਹੇ ਦਿਨ ਆਉਂਦੇ ਰਹਿਣ ਅਤੇ ਉਸ ਦੇ ਜੀਵਨ ਨੂੰ ਖੁਸ਼ੀ ਦਿੰਦੇ ਰਹਿਣ।