कभि हिम्मत ना हारिन
Kabhi Himmat Na Harin



हम तै इन सोचिक चन्न चयाँद कि—

हम प्रकृति-पुत्र छवाँ। 

हमन पाडू मा जन्म ल्याई, 

ये वास्ता कि—

हम ऊँकी तरां सदानि—

ठोस अर संघर्सरत खाँ। 

पर कभि हिम्मत नि हारवाँ । 

मित्रो! मीन गंगा त बिसाल चट्टानूंक दगड़ टकराँद,

लड़द-झगड़द अर बतियाँद, द्याखी। 

पर कभि निरास-हतास, हिम्मत हार्द नि द्याखी, 

वा समस्त पथ-बाधों से पार करीक,

अपण मंजिल-प्रेम-पयोनिधि तक पौंची जाँद । 

वींकि प्रबल इच्छासक्ति ही त वीं तै उख तक पौंचाँद, 

कभि तुमन फूलू की घाटी त देखी ह वेली। 

उ बनफूल इनि त रैदन बुन्न कि—

जिदगी हमरी तरां मुस्कराण कुण छ, 

रूण-गिड़गिड़ाण कुण नी छ ।