ਮੇਰਾ ਘਰੇਲੂ ਬਗੀਚਾ 
Mera Gharelu Bagicha



ਅੱਜ ਦੇ ਯੁੱਗ ਵਿੱਚ ਘਰੇਲੂ ਬਗੀਚਾ ਲਾਉਣਾ ਵੀ ਇੱਕ ਉੱਘਾ ਸ਼ੌਕ ਬਣ ਕੇ ਉੱਭਰ ਰਿਹਾ ਹੈ। ਪਿੰਡਾਂ ਵਿੱਚ ਲੋਕਾਂ ਕੋਲ ਕਾਫੀ ਥਾਂ ਹੁੰਦੀ ਹੈ ਪਰ ਉਹਨਾਂ ਦਾ ਧਿਆਨ ਖੇਤੀਬਾੜੀ ਵੱਲ ਹੀ ਜ਼ਿਆਦਾ ਰਹਿੰਦਾ ਹੈ। ਸ਼ਹਿਰਾਂ ਵਿੱਚ ਮਨੁੱਖ ਭੀੜ ਭਰੇ ਮਾਹੌਲ ਵਿੱਚ ਹਰਿਆਲੀ ਦੀ ਭਾਲ ਕਰਦਾ ਹੈ ਪਰ ਵਧ ਰਹੇ ਮਸ਼ੀਨੀਕਰਨ ਦੇ ਇਸ ਦੌਰ ਵਿੱਚ ਉਸ ਨੂੰ ਦਰ-ਦਰ ਤੱਕ ਹਰਿਆਲੀ ਪਾਪਤ ਨਹੀਂ ਹੁੰਦੀ। ਉਹ ‘ਕੰਕਰੀਟ ਦੇ ਜੰਗਲ’ ਵਿੱਚੋਂ ਪ੍ਰਕਿਰਤੀ ਦਾ ਅਨੰਦ ਕਿੱਥੋਂ ਮਾਣ ? ਇਸ ਦਾ ਹੱਲ ਹੈ ਘਰੇਲੂ ਬਗੀਚਾ। ਬਗੀਚੇ ਦੇ ਬਿਨਾਂ ਘਰ ਨੂੰ ਅਧੂਰਾ ਮੰਨਿਆ ਜਾਂਦਾ ਹੈ। ਘਰੇਲੂ ਬਗੀਚੇ ਵਿੱਚ ਲੋਕ ਜਿੱਥੇ ਛਾਂ ਵਾਲੇ, ਫਲਦਾਰ ਅਤੇ ਫੁੱਲਾਂ ਵਾਲੇ ਬੂਟੇ ਲਗਾਉਂਦੇ ਹਨ ਉੱਥੇ ਨਾਲ-ਨਾਲ ਸਬਜ਼ੀਆਂ ਵੀ ਉਗਾਉਂਦੇ ਹਨ। ਘਰ ਦੀਆਂ ਸਬਜ਼ੀਆਂ ਦਾ ਸੁਆਦ ਹੀ ਵੱਖਰਾ ਹੁੰਦਾ ਹੈ। ਸਾਰੇ ਦਿਨ ਦਾ ਥਕੇਵਾਂ ਰੁੱਖਾਂ ਦੀ ਛਾਂ ਵਿੱਚ ਬੈਠ ਕੇ ਅਤੇ ਰੰਗ-ਬਰੰਗੇ ਫੁੱਲਾਂ ਨੂੰ ਦੇਖ ਕੇ ਦੂਰ ਹੋ ਜਾਂਦਾ ਹੈ। ਫਲਦਾਰ ਬੂਟੇ ਉਗਾ ਕੇ ਅਸੀਂ ਮੌਸਮੀ ਫਲਾਂ ਦਾ ਵੀ ਅਨੰਦ ਪ੍ਰਾਪਤ ਕਰ ਸਕਦੇ ਹਾਂ। ਘਰੇਲ ਬਗੀਚੇ ਦੀ ਸਾਂਭ-ਸੰਭਾਲ ਜੇ ਆਪ ਕੀਤੀ ਜਾਵੇ ਅਥਵਾ ਜੇਕਰ ਬੂਟਿਆਂ ਨੂੰ ਆਪ ਪਿਆਰ ਨਾਲ ਪਾਲਿਆ ਜਾਵੇ ਤਾਂ ਬਗੀਚੇ ਨਾਲ ਸਾਡੀ ਸਾਂਝ ਬਹੁਤ ਡੂੰਘੀ ਹੋ ਜਾਂਦੀ ਹੈ। ਬਗੀਚੇ ਵਿੱਚ ਆਪ ਕੰਮ ਕਰਨ ਨਾਲ ਤਾਜ਼ੀ ਹਵਾ ਅਤੇ ਸੁੰਦਰ ਵਾਤਾਵਰਨ ਨਾਲ ਸਾਡੀ ਸਿਹਤ ਠੀਕ ਰਹਿੰਦੀ ਹੈ। ਸਾਡਾ ਜੀਵਨ ਪ੍ਰਸੰਨਤਾ ਨਾਲ ਗੁਜ਼ਰਦਾ ਹੈ, ਅੱਖਾਂ ਨੂੰ ਤਰਾਵਟ ਮਿਲਦੀ ਹੈ ਅਤੇ ਸਰੀਰ ਚੁਸਤ ਰਹਿੰਦਾ ਹੈ। ਜਿਨ੍ਹਾਂ ਘਰਾਂ ਵਿੱਚ ਬਗੀਚੇ ਲਈ ਲੋੜੀਂਦੀ ਥਾਂ ਨਹੀਂ ਹੁੰਦੀ ਉੱਥੇ ਲੋਕ ਗਮਲਿਆਂ ਵਿੱਚ ਬੂਟੇ ਲਗਾਉਂਦੇ ਹਨ। ਜੋ ਲੋਕ ਘਰਾਂ ਵਿੱਚ ਉੱਪਰਲੀਆਂ ਮੰਜ਼ਲਾਂ ਤੇ ਰਹਿੰਦੇ ਹਨ ਉਹ ਵੀ ਗਮਲਿਆਂ ਵਿੱਚ ਬੂਟੇ ਆਦਿ ਉਗਾ ਸਕਦੇ ਹਨ। ਲੋਕ ਘਰਾਂ ਦੇ ਅੰਦਰ ਵੀ ਕਈ ਵੇਲਾਂ ਲਗਾਉਂਦੇ ਹਨ ਅਤੇ ਆਪਣੇ ਚੌਗਿਰਦੇ ਨੂੰ ਹਰਿਆ-ਭਰਿਆ ਬਣਾਉਣ ਦੀ ਕੋਸ਼ਸ਼ ਕਰਦੇ ਹਨ। ਜਿੱਥੇ ਘਰੇਲੂ ਬਗੀਚਾ ਇੱਕ ਛੋਟੀ ਜਿਹੀ ਹਰੀ-ਭਰੀ ਖੇੜੇ ਵੰਡਦੀ ਥਾਂ ਹੈ ਉੱਥੇ ਇਹ ਧਰਤੀ ਦੇ ਵਾਤਾਵਰਨ ਦੇ ਸੰਤੁਲਨ ਨੂੰ ਬਣਾਉਣ ਵਿੱਚ ਵੀ ਮਦਦ ਕਰਦਾ ਹੈ।